2025/2026

Ikasturte honetarako ere Aisiola Hezitzaile Eskolak, haur eta gazteen aisialdirako hezitzaile izateko ikastaroak antolatuko ditu.

AISIOLAren xedea da, euskara, gizartea eta ingurugiroarekiko errespetua funtsezko balioak direla ulertuta, jolasa nahiz sormena ikasteko eta garatzeko berariazko tresnatzat hartuz, hezkuntza ez-formalaren bidez kalitatezko prestakuntza euskalduna eskaintzea.

Gure ikasleek etorkizunean lan-munduan erantzunkizunez, autonomiaz eta arduraz jarduteko gaitasuna lortzeko egiten dugun lan, balio hauetan oinarrituz: Euskalduna, ingurumenarekin konprometitua, hurbilekoa, profesionala eta bizikidetza erdigunean jartzen duena.

NOIZ eta norentzat

2025eko urritik 2026ko maiatzera - 17 urtetik gorako ikasleentzat
(Ostiralero, 15:30-20:30)

Izen ematea: irailaren 8tik 26ra.

2026ko urtarriletik 2027ko maiatzera - 16 urtetik gorako ikasleentzat
(Bi ostiraletik behin, 15:30-20:30)

Izen ematea: azaroaren amaieran zabalduko da.

PREZIOA

Ikastoletako ikasleek: 450€

Gainerakoek: 475€

Formakuntzarekin oro har eta aisialdiko hezitzaile ikastaroarekin, bereziki, erabat engaiaturik gaude. Aisialdi hezitzailerik ez baitago hezitzailerik gabe. Kalitatezko aisialdiaz gozarazi eta gozatuko duten hezitzaile labekada berriak etorriko dira Aisiolaren eskutik.

Egun, Aisiola Hezitzaile Eskolan, urtero 500 ikasle inguru izaten ditugu; Euskal Herriaren mendebaleko lau herrialdeetan ematen diren 25 ikastaroetan banatuak. Nafarroa, Araba, Bizkaia eta Gipuzkoako gazteek aukera dute aisialdiaz den ikastarorik osatu eta sakonena eginez, ondoren lanerako beharrezkoa den titulazioa eskuratzeko.

Gure ikastaroen hartzaileak, nagusiki, ikastoletan haien ibilbidea amaitzear diren Batxilergoko ikasleak badira ere, ez dira horiek partaide bakarrak; ikastoletatik kanpoko gazteak ere izaten dira gure ikastaroetan. Ateak zabalik dira, gurean, aisialdiaren mundua maite duen ororentzat.

IKASTAROAREN XEHETASUNAK

Eusko jaurlaritzak ematen duen “Haur eta gazteen aisialdirako begirale diploma” nahiz LANBIDEk (EAE) eta NAFARROAKO GOBERNUAK (Nafarroa) emandako “HAUR ETA GAZTEEN AISIALDIKO JARDUEREN DINAMIZAZIOA ZIURTAGIRI OFIZIALA”.
Ikastaroaren iraupena 150 ordu teoriko eta 160 ordu praktiko izango da.
- Atal praktikoa egin ahal izateko, praktikak egingo diren urte horretan 18 urte bete beharko ditu ikasleak.
Formatzaile taldea, Ikastolen Elkarteko Aisiola hezitzaile eskolan trebaturikoa izango da.
Taldeak osatu ahal izateko ikasle kopuru minimoa 10ekoa izango da.